स्थानीय तह उपनिर्वाचनमा २६ दलद्वारा दर्ताको आवेदन

२०८१ असोज १७ बिहीबार

आगामी १६ मंसिरका लागि तय भएको स्थानीय तह उपनिर्वाचनमा भाग लिन २६ दलले दर्ताका लागि निवेदन दिएका छन् । प्रमुख निर्वाचन आयुक्त दिनेश थपलियाका अनुसार संसद्का प्रमुख दलहरू कांग्रेस, एमाले र माओवादीसहितका विभिन्न २६ दलले दर्ताका लागि निवेदन दिएका हुन् । आयोगले १० असोजदेखि बुधबार (१६ असोज)सम्म समय तोकेर दल दर्ताका लागि आवेदन खुलाएको थियो ।

प्रमुख निर्वाचन आयुक्त थपलियाले आयोगले बिहीबारबाट छानबिन गर्ने र योग्यता पुगेका दल दर्ता गर्ने बताए । सानो संख्यामा निर्वाचन हुन लागेको भए पनि धेरै दलबाट उत्साहजनक रूपमा दल दर्ताको आवेदन परेको उनको भनाइ छ । ‘स्थानीय तह उपनिर्वाचनमा भाग लिने प्रयोजनका लागि २६ दलले दर्ताका लागि आवेदन दिएका छन्् । सानो संख्यामा निर्वाचन हुन लागेको भए पनि दर्ताका लागि धेरैको संख्यामा दलहरूबाट दर्ताका लागि आवेदन आएका छन्,’ उनले नयाँ पत्रिकासँग भने, ‘आवेदनउपर छानबिन गरेर योग्यता पुगेका दललाई दर्ता गर्नेछौँ । दर्ताका लागि आवेदनको योग्यता नपुगेका दल निर्वाचनमा सहभागी हुन पाउनेछैनन् ।’

जिल्ला समन्वय समिति प्रमुख दुई, नगरपालिकाका मेयर र उपमेयर एक–एक, गाउँपालिका अध्यक्ष दुई, गाउँपालिका उपाध्यक्ष तीन र ३० वडाध्यक्ष गरी ३९ पदका लागि निर्वाचन हुन हुँदै छ । आयोगले यसअघि नै २ मंसिरमा उम्मेदवारी दर्तासहितको निर्वाचन कार्यतालिका सार्वजनिक गरेको छ । कार्यतालिकाअनुसार ३ मंसिरमा उम्मेदवारविरुद्ध उजुरी आह्वान, ५ मंसिरमा उम्मेदवारी फिर्ता, अन्तिम नामावली प्रकाशन र निर्वाचन चिह्न प्रदान गर्ने कार्यतालिका छ । मतदान सुरु हुनुभन्दा ४८ घण्टा अगाडिबाट १३ मंसिरको राति १२ बजेबाट मौन अवधि सुरु हुनेछ ।

निर्वाचन हुन लागेका ३९ स्थानमा ०७९ वैशाखमा भएको स्थानीय तह निर्वाचनमा कांग्रेसले २४ स्थान, माओवादीले पाँच, एमालेले आठ, जसपाले एक र एक स्वतन्त्र उम्मेदवार निर्वाचित बनेका थिए । परिवर्तित राजनीतिक परिस्थितिमा हुन लागेको उपनिर्वाचनलाई दलहरूको शक्ति परीक्षणको रूपमा हेरिएको छ । निर्वाचनमा दलहरूलाई स्थानीय तहमा आफ्नो जनाधार जोगाउने चुनौती छ ।