डिसेम्बरदेखि ‘पठान २’ को छायांकन गर्दै शाहरुख

२०८० फागुन ८ मंगलबार

यशराज फिल्म्सको जासूस ब्रह्माण्ड ‘पठान’बाट शाहरुख खान गतवर्ष एक्सन फिल्मतिर मोडिए । सिद्धार्थ आनन्द निर्देशित यो फिल्मले गतवर्ष उछाल कमाइ गर्‍यो । संकटमा फसेको बलिउडलाई समेत यसले उद्द्धार गर्‍यो ।

शाहरुखसहित दीपिका पादुकोण र जोन अब्राहमको शीर्ष भूमिका रहेको फिल्मले ‘बाहुबली २’ को कलेक्सनलाई समेत उछिन्दै धेरै कमाउने ग्रसर फिल्मको रुपमा रेकर्ड रच्यो । भविष्यमा पनि सिक्वेल बनाउने बाटो खुला गर्दै ‘पठान’को पहिलो भाग टुंगिएको थियो । स्वभाविक रुपमा, युनिभर्सको उद्देश्य नै धेरैभन्दा धेरै श्रृंखला र चरित्र हुनु हो ।

बलिउड पोर्टल पिंकभिल्लाका अनुसार शाहरुख जासूसको रुपमा पुनः फर्किन तयार छन् । निर्माता आदित्य चोपडाले आफ्नो महत्वाकांक्षी प्रोजेक्टको रुपमा घोषणा गरेको ‘पठान’को दोस्रो श्रृंखला बन्ने निश्चित भएको छ । फिल्मको छायांकन आउँदो डिसेम्बरदेखि सुरु हुने जनाइएको छ ।

स्पाइ-युनिभर्सको यो नयाँ फिल्मले पठान भर्सेस टाइगरको कथावस्तुलाई अघि बढाउनेछ । यो फिल्ममा शाहरुख र सलमान एकसाथ देखिनेछन्, जसको पहिलो झलक अघिल्लो श्रृंखलामा आइसकेको छ ।

जनवरी २०२३ मा ‘पठान’ रिलिज हुनेबित्तिकै शाहरुख र आदित्यले यो फिल्मलाई स्पिनअपको रुपमा बनाउने निर्णय लिएका थिए । ‘पठान’ यशराज ब्यानरले निर्माण गरेको स्पाइ युनिभर्सको आठौं फिल्म हो । यो युनिभर्समा एक था टाइगर, टाइगर जिन्दा है, वार, पठान, टाइगर ३, वार २ र आलिया भट्ट स्टारर अनटाइटल फिल्म छन् ।

पठान’ स्पाइ युनिभर्समा सर्वाधिक ५४० करोड कमाउने फिल्म हो । यसले विश्वभर एक हजार करोड भारु कमाइ गरेको छ ।